HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 79 4084 Arnavudluk'a Muʻâvenet Açlığın taht-ı tehdîdinde kalan Arnavutluk'un dağlık havâlîsi ahâlîsine İtalya Salîb-i Ahmeri, hükûmetinin ve Arnavud Salîb-i Ahmeri'nin müsâʻade-i mahsûsasıyla 300 ton erzâk ve 6.000 parça elbise göndermişdir. Bu erzâk Kânûn-ı Sânî ayı ihtiyâcâtına kifâyet edecekdir. Ancak hükûmet-i mahalliye tarafın- dan yeniden taleb vukûʻunda sevkiyâta devâm olunacakdır. Muvakkaten tevzîʻ mahalli intihâb olunan İşkodra şehrinin menâʻat-ı mevkiʻiyesinden dolayı gönderilen mevâdd-ı iʻâşe mahalline pek müşkilâtla vâsıl olmakdadır. Arnavutluk'un mıntıka-i şimâliyesine sevkiyât bahren yapılmakdadır. Bundan mâʻadâ, İtalya Salîb-i Ahmeri Arnavudluk'a ayrıca bir heyʼet-i sıhhiye-i imdâdiye de iʻzâm etmişdir. _______________ [449] İsviçre Salîb-i Ahmer Hemşîrelerinin Şimendifer Biletleri İsviçre Salîb-i Ahmer hastabakıcı hemşîreleri resmî elbiselerini lâbis oldukları hâlde insânî ve ictimâʻî bir vazîfe için yani hastahânelerde hastaları tedâvî ve ziyâretçi hastabakıcılık ve bizzât kendi sıhhatlerinin tedâvîsi için memleket dâhilinde bir mahalden âhar mahalle azîmet ve avdetlerinde nısf ücretle icrâ-yı seyâhat etmek imtiyâzına mâlikdirler. Bu hemşîrelere verilecek avdet biletleri yalnız üç ay için muʻteberdir. _______________ Ziyaretçi Hastabakıcı Kurları Cenevre Salîb-i Ahmer şuʻbesiyle kadınlara mahsûs Tedkîkât-ı İctimâʻiye Mektebi müştereken ziyâretçi hastabakıcı kurları vermeğe başlamışlardır. 9 Kânûn-ı Sânî'den 23 Şubat'a kadar devâm eden ve evsâf-ı mahsûsayı hâiz hemşîrelere hitâb edilen bu mütemmim kurlar dürûs-ı nazariyeyi, ziyâretleri ve tatbîkât-ı umûmiyeyi muhtevîdir. Kurların nazariyât kısmı programı şudur: 8 sâʻat teşrîh ve fizyoloji müzâkeresi 8 sâʻat tabâbet-i dâhiliyeye âid mesâil 3 sâʻat mesâil-i cerrâhiye 4 sâʻat emrâz-ı cildiye-i sâriye 6 sâʻat ictimâʻî hıfzıssıhha 16 sâʻat kadın hıfzıssıhhası 5 sâʻat çocuk bakımı