HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 80 4117 İzmir'in dûçâr olduğu bu felâkete büyük bir alâka ve samîmî bir teessürle iştirâk buyuran reîsi- cumhûr hazretleri İzmir vilâyetine âtîdeki telgrafnâmeyi keşîde buyurmuşlardır: "-İzmir ve civârındaki zelzelelere ve îkâʻ etdiği hasârâta teessürlerle muttaliʻ oldum. Güzel maʻmûremizin ve azîz hemşehrilerimin ıztırâblarına büyük bir alâka ve samîmî bir hassâsiyetle iş- tirâk ederim. Memleketin her tarafından teessürât ve ıztırâbâta iştirâk haberleri [374] alıyorum. Bu müşterek ıztırâb ve hassîsiyet mûcib-i tesliyetdir. Vefât edenlerin âilelerine taʻziyetlerimin ve mec- rûhlara tahassüsâtımın iblâğını ricâ ve felâketzedelerden en muhtâcların en âcil ihtiyâclarına sarf edilmek üzere on bin lira takdîm ediyorum". Reîsicumhûr Gâzî M. Kemal " *** Merkez-i umûmîmiz de umûm millete hitâben şu beyânnâmeyi neşretmişdir: "-İzmir ve civârında vukûʻa gelen hareket-i arz felâketzedelerinin ibâte ve iʻâşeleriyle her türlü sıhhî ihtiyâclarını teʼmîne şitâb eden ve bu muʻâveneti daha vâsiʻ mikyâsda idâme etdirmeğe karâr veren Hilâl-i Ahmer Merkez-i Umûmîsi necîb ve hamiyet-perver halkımızı bu umûmî yardıma iştirâ- ke daʻvet ve nakden vukûʻ bulacak teberruʻâtın doğrudan doğruya Ankara'da Hilâl-i Ahmer Merkez-i Umûmîsi'ne veya merkez ve şuʻbelerine tevdîʻ ve irsâl olunmasını muhterem milletimizden ricâ eder. *** İstanbul Şehremâneti'nin Felâketzedelere Yardımı İstanbul Şehremâneti İzmir ve mülhakâtı hareket-i arz musâbînine on bin lira teberruʻ etmişdir. _______________ İstanbul'da İzmir zelzelesi için Nisan'ın on dördüncü gününe kadar toplanan iʻâne yekûnu yirmi sekiz bin liraya bâliğ olmuşdur. Vatandaş! Felâketzede Kardeşlerin Yardım İstiyor! İzmir felâketi, memleketimizin her tarafında olduğu gibi İstanbul'da da elîmakisler tevlîd etmişdir. Bu umûmî teessürâtın netîcesi olarak Halk Fırkası Müfettişi Hakkı Şinasi Paşa'nın riyâseti altında teşekkül eden komisyon iʻâne cemʻine başlamışdır. Bankalar, sinemalar, lokantalar vesâir müessesât-ı mâliye ve ecnebiye felâketze- de kardeşlerimize muʻâvenet maksadıyla âdetâ rekâbet edercesine vilâyete mürâcaʻat etmekdedirler. Bu vazîfe-i vataniyeyi îfâ ve edâ için muhterem İstanbul halkının bir an tereddüd etmeyeceği şübhesizdir. Vatandaş! Açıkda ve perîşân kalan ihtiyârları, yavrusunu bağrına basan anneleri, yuvaları harâb olanları düşün! Rahîm, Asîl Türk, Yardımını Unutma!