HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 80 4143 Karşıyaka'da, Tepeköyü'ndeki dispanserlerimizde bir sene zarfında 22.628 hastanın tedâvîsi îfâ ve muʻâleceleri de meccânen iʻtâ kılınmışdır. Maʻlûm-ı âlîleridir ki, Hilâl-i Ahmer umûmî muʻâvenet esâsları üzerine teʼsîs edilmiş ve mu- vaffakiyâtını ancak bu sûretle tecellî etdirmiş olduğundan münferid muʻâvenet husûsâtını nizâmnâ- mesi mûcebince dâire-i salâhiyetinden hâric tutmuşdur. Hudâ-negerde bir harb zuhûrunda Hilâl-i Ahmer bütün mevcûdiyetiyle bir vazʻiyet almak mecbûriyetinde olduğundan vakt-i hazerde dâimâ bu esâs dâiresinde levâzımını ihzâr ve iddihâr etmekle mükellef olduğu gibi memleketin herhangi bir tarafında harekât-ı arziye, tuğyân-ı miyâh ve büyük yangınlar gibi âfât zuhûrunda imdâda koşmağı vazîfe-i esâsiye olarak kabûl etmişdir. Bu sebebledir ki, Hilâl-i Ahmer dâimâ seferber ve müstahzır bir hâldedir. Merkez-i umûmînin lütuf ve müsâʻadeleriyle merkezinizde karyolalarıyla, yataklarıyla, çadırlarıyla ve her türlü idârî ve sıhhî levâzımıyla mücehhezdir. Bu teşkîlâtın istilzâm eylediği fe- dâkârlığı takdîr ve bu iʻtibârla münferid muʻâvenetde bulunamamakda maʻzeretimizi kabûl buyura- cağınızdan ümîdvârız. Muhterem Beyler, Hanımlar! 1927 senesi zarfındaki icrâât ve muvaffakiyâtımız bu maʻrûzâtımızdan ibâretdir. 1928 senesi için tanzîm etdiğimiz büdceyi nazar-ı tedkîkinize arz ediyoruz. Tedkîk ve mütâlaʻasından anlaşılacağı vechile bu seneki büdcemiz de geçen seneki tahmînimizin fevkine çıkamayacakdır. Kanâʻat-ı umû- miyemize göre bu sene de 58.000 liradan fazla vâridât istihsâlini imkânsız görmekdeyiz. Maʻamâfîh bu husûsda aʻzamî mesâʻîden geri durulmayacağından daha fazla muvaffakiyet ihtimâlinden de katʻ-ı ümîd etmiş değiliz. Muʻâvenet-i umûmiyeye âid dispanserlerimizin masârıfât-ı umûmiyesi olan 16.500 liranın da tamâmen teʼmîn edileceği şübhesizdir. Masârıfâtımız muʻayyen ve müsbet oldu- ğundan tenzîline imkân yokdur. Meʼmûrlarımıza verdiğimiz maʻâş emsâline nisbetle çok dûn bir derecede olduğu hâlde vazifelerini büyük bir aşk ile ve muvaffakiyetle îfâ etmekde olmalarından müteʻaddid defa merkez-i umûmînin de mazhar-ı takdîri olmuş ve ahîren son iki senelik hesâbâtımızı tedkîk ve teftîş etmiş olan merkez-i umûmî müfettişlerinden Fahri Beyefendi de usûl ve karâr hâricin- de hiçbir muʻâmeleye tesâdüf etmemiş ve mûcib-i tenkîd hiçbir mâdde görmemiş olmalarına mebnî hiss-i fedâkârîye numûne olan ve intizâm-ı mesâʻî ile meşbûʻ bulunan meʼmûrlarımızı takdîr ve bu tahassüsât ve kanâʻatlerini [395] tezkere-i mahsûsa ile heyʼet-i merkeziyemize de iblâğ ve teʼyîd eylemişlerdir. Vâridâtımızı tezyîd için bu sene de aʻzâ kaydına büyük bir ihtimâmla devâm olunacak ve devâirde sarfı teʼmîn edilip geçen sene iyi bir netîce vermiş olan şefkat pulları sarfiyâtının daha şümûllü bir şekilde sarfı için teşebbüsâtdan geri durulmayacakdır. Geçen sene şuʻâbâtımızda da mahsûs bir terakkî görülmüş, nizâmnâme ve taʻlîmâtnâmeleri- miz ahkâmının tamâmen tatbîki için bu sene daha ziyâde âsâr-ı salâh ve terakkî görüleceği kaviyyen meʼmûl bulunmuşdur. Nizâmnâme-i esâsînin 84'üncü mâddesi ahkâmına tevfîkan tanzîm olunan rûznâme-i müzâ- kerâtda muharrer mevâddın müzâkere ve intâcını ricâ ve cemʻiyetimize karşı pek mühim yardımlarda bulunan esâmîsi merkezimizce mazbût zevât-ı muhtereme ile kezâlik cemʻiyetimizin muʻâmelâtını teshîl etmek üzere dâimâ halkımızı irşâd ve teşvîk eden erkân-ı matbûʻâta şu vesîle ile de takdîm-i teşekkürât eyleriz. _______________