HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 80 4154 İngiliz Salîb-i Ahmeri Romatizma Tedâvîsine Mahsûs Dispanserler İngiliz Salîb-i Ahmeri memleketin pek müzdeham merkezlerinde romatizma tedâvîsine mahsûs dispanserler teʼsîsine karâr vermişdir. Londra'nın merkez mahallâtından birinde açılacak olan ilk dispanserin masârıf-ı teʼsîsiyesi için lüzûmu olan 40.000 İngiliz lirasının 15.000 lirası bazı erbâb-ı hamiyet ve insâniyet tarafından vaʻd ve taʻahhüd edilmişdir. Müzmin romatizmalılarla âfetin ilk aʻrâzıyla maʻlûl olanlar ültraviyole, elektrik, banyo, masaj tedâvîsine tâbiʻ bulundurulacaklardır. Hastaların mürâcaʻat sâʻatleri tarz-ı hayâtlarını ve sanʻat ve meşgûliyetlerini ihlâl etmeyecek sûretde tertîb edilmişdir. Müdâvât müddeti bir ay ile altı hafta arasında tahallüf eden 10 ilâ 15 seans edildiğine nazaran senede 12.000 hasta tedâvî edilmiş olacakdır. Dispansere muʻtedil bir ücret-i tedâvîyi teʼdiyeye muktedir romatizmalılarla tedâvîlerine ve aynı zamânda işlerine devâm edecek amele kabûl olunacakdır. Dispanser için yapılan proje büyük sanâyiʻ teşkîlâtı mümessilleriyle amele sendikası tarafından tasvîb edilmişdir. Amsterdam Merkez İstatistik Kalemi Felemenk'de 1925 senesinde kanserden nisbet-i vefeyât % 11.57, emrâz-ı kalbiyeden % 11.42, ciğer vereminden % 7.16, ihtiyârlıkdan % 7.38'dir. Emrâz-ı kalbiyeden mikdâr-ı vefeyât 1915 senesinde 7.31 ve 1924'de 9.05 iken 1925'de mik- dâr-ı mezkûr yukarıda görüldüğü üzere birdenbire tezâyüd etmişdir. Kanserden 1915'de % 8.72, 1920'de % 8.39, 1923'de % 11.42, 1924'de % 11.43'dür. Marazın erkeklerden ziyâde kadınlara ârız olduğu görülmekde [ve] vefeyât nisbetinin bu sûretle mütemâdiyen tezâyüdü mûcib-i endîşe olmakdadır. İtalya Vereme Karşı Mecbûrî Sigorta İtalya'da maʻlûliyet sigortasına tâbiʻ olan erbâb-ı mesâʻînin vereme karşı da sigorta edilmesi hakkındaki mecbûriyet-i kânûniye 27 Teşrîn-i Evvel 1927 târîhli emirnâme ile iʻlân olunmuşdur. Bu sûretle yedi buçuk milyon işçi sigorta edilmiş oluyor. Mesʼûl Müdürü: Arif Süleyman