HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 81 4227 2-Deniz, ırmak, nehir ve göl kenârlarında ve umûma mahsûs yüzme havuzları yakınında; ev, baraka, çadır içlerinde imdâd merkezi teʼsîs olunacakdır. 3-Bu imdâd merkezleri mümkün olduğu kadar: Evvelen, telefonla mücehhez bir meʼmûr odasını, Sâniyen, ilk imdâdın icrâ ve tatbîkine mahsûs bir odayı Sâlisen, hem anbâr makâmında ve hem palto, elbise vazʻında istiʻmâl edilecek üçüncü bir odayı müştemil olacakdır. 4-Hükûmet-i mahalliye tarafından teʼsîs edilecek imdâd ve muʻâvenet merkezlerinin Salîb-i Ahmerce müesses olanlara mutâbık bulunmasına cemʻiyet dikkat edecekdir. 5-İmdâd ve muʻâvenet merkezleri umûru cinseyne nazaran erkek veya kadınlar tarafından teʼmîn edilecekdir. Meʼmûrînden lâ-ekal ikisi yüzme ve tahlîsiyeden muvaffakiyetle imtihân vermiş ve bir kayık veya sandalı idâre edecek kâbiliyetde olacakdır. Tahlîsiye hizmetine dâhil olabileceklerin sinleri yirmiden dûn ve 40'dan yukarı olmayacakdır. Bunlar her sene açılacak müsâbakalara iştirâk edecekler ve bir tabîb tarafından muʻâyene olu- nacaklardır. Meʼmûrînin bîhûde yere tehlikeye maʻrûz kalmaması için tedâbîr-i lâzıme ittihâz edilecek ve binâenaleyh bir tahlîsiye ameliyesi yalnız başına bir şahsa tahmîl olunmayacak ve îcâb eden âlât ve levâzım ile mücehhez mikdâr-ı kâfi yardımcı hâzır bulunacakdır. 6-Taʻtîl mevsiminde, eyyâm-ı mahsûsada, deniz sporlarında imdâd merkezlerinin irtibât ve muhâberâtı, işâret bayraklarıyla teʼmîn edilecek bir tarzda teʼsîs olunacakdır. 7-Meʼmûrîn mümkün olduğu takdîrde mağrûkînin hüviyetini tesbît edecekdir. Bunların evrâk-ı husûsiyesi, mücevherât ve zî-kıymet eşyâsı ancak şühûd huzûrunda tedkîk ve emîn bir mahalle vazʻ edilecekdir. 8-İlk imdâd ve muʻâvenetin icrâsı meccânîdir. Kazâzedeler yalnız pansuman ve edviye bedelini teʼdiye edeceklerdir. 9-Heyʼet-i meʼmûrîni teşkîl eden aʻzâ vazîfelerini hasbî olarak îfâ ederler. Maʻamâfîh bunların yol masrafları için kendilerine tazmînât verilebilir. 10-En yakın imdâd merkezinin bulunduğu mahal deniz hammâmlarına ve sâhil boyuna taʻlîk edilecek levhalarda gösterilecekdir. _______________ Belçika Çiçek Aşısı Belçika'da çiçek illetine karşı aşılanma mecbûrî değildir. Çok zamân evvel bu bâbda ihzâr edilmiş olan kânûn lâyihası henüz parlamentodan geçmediğinden Belçika Salîb-i Ahmer Merkez-i Umûmîsi çiçek aşısını mecbûr kılacak kânûnun mecâlis-i teşrîʻiyece bir an evvel kabûl ve tasdîkine mütedâir bir temennîyi Dâhiliye ve Sıhhiye nâzırına tevdîʻ etmişdir. _______________