HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 82 4252 Mâdde 15- Terfîʻ için her meʼmûriyetde en aşağı iki sene bulunmak lâzımdır. Terfîʻde kıdem esâs olmakla berâber ehliyet şartdır. Ehliyetin takdîri heyʼet-i idâreye âiddir. Mâdde 16- Lâ-ekal üç sene bulunduğu meʼmûriyetde kalarak mâ-fevka meʼmûriyete taʻyînleri icrâ kılınmayan ve mâ-fevka meʼmûriyetler de münhal bulunmadığından veya doğrudan doğruya mâ-fevka meʼmûriyet olmadığından terfîʻ edemeyen meʼmûrînin maʻâşlarına her üç senede bir yüzde on zam yapılır. Vazîfesinde dirâyet ve ehliyet gösteremeyenler hakkında bu müddet heyʼet-i idâre karârıyla temdîd olunabilir. Mâdde 17- Vazîfesinde fevkalâde muvaffakiyet gösteren meʼmûrlar muvaffakiyetlerinin dere- cesine göre heyʼet-i idârece takdîrnâme veya üç maʻâşa kadar ikrâmiye ile taltîf olunurlar. Mâdde 18- İnzibâtî cezâlar şunlardır: a-Meʼmûrun idârî veya inzibâtî nakîkası dolayısıyla vazîfesinde dikkata daʻvet, âmiri tarafın- dan icrâ edilecek ihtâr b-Meʼmûrların bir günden on beş güne kadar maʻâşının katʻı c-Bir derece mâ-dûn meʼmûriyete indirilmesi d-Bir daha Hilâl-i Ahmer hizmetinde kullanılmamak üzere meʼmûriyetden ihrâc İhtârı mûcib hâller şunlardır: Kendisine tevdîʻ olunan işleri teehhurla [479] yapmak, iş başında vazîfesine taʻalluk etmeyen şeylerle iştigâli iʻtiyâd etmek, rüfekâsına dürüşt muʻâmelede bulunmak, vakâra münâfi hareketleri görülmek, işde intizâmsızlık göstermek, bir ay zarfında vazîfesi başına bilâ-maʻzeret üç defa geç gelmek veya erken gitmek Maʻâş katʻını mûcib hâller şunlardır: Dâireye sarhoş gelmek, mâ-dûnuna ve ashâb-ı mesâlihe sû-i muʻâmelede bulunmak, âmirine hürmetsizlik göstermek, bir ayda birbiri ardınca bilâ-maʻzeret ve sekiz günden az vazîfesi başında bu- lunmamak, bilâ-meʼzûniyet matbûʻâta beyânâtda bulunmak, bir senede üç defa ihtâr cezâsına dûçâr olmak. Sınıf tenzîlini îcâb etdiren hâller şunlardır: Mecmûʻu senede bir ayı tecâvüz eden sık sık tekerrür edecek bilâ-maʻzeret devâmsızlıkları, nizâmnâmelere ve karârlara tevfîkan verilecek emirleri infâz etmemek, kumar oynamak, bir senede üç defa maʻâş katʻı cezâsına uğramak, sunʻ ve taksîri netîcesinde cemʻiyetden kendi zimmetinde para bulundurmak İhrâcı mûcib hâller şunlardır: Kumar ve sarhoşluk iʻtiyâd etmek, âr ve hicâbı mûcib hareketde bulunmak; harb, ihtilâl, isyân gibi fevkalâde ahvâlde bilâ-emir ve bilâ-zarûret vazîfe-i meʼmûriyetini terk etmek, meʼmûriyetine âid mahrem dosyalar mündericâtını ifşâ etmek, gerek vazîfe-i meʼmûriyeti iʻtibârıyla gerek şahsî bir cürmünden dolayı lâ-ekal altı ay habse mahkûm olmak, siyâsî cemʻiyetlere intisâb etmek ve siyâsî faʻâliyetde bulunmak, iki defa sınıf tenzîli cezâsına dûçâr olmak Mâdde 19- İnzibâtî cezâlar heyʼet-i idâre karârıyla taʻyîn olunur. Mâdde 20- Meʼmûr aleyhine inzibâtî ve cezâî bir muʻâmeleyi müstelzim olmamak şartıyla kalem âmirleri tarafından vukûʻ bulacak şikâyet üzerine o meʼmûrun rızâsına bakılmayarak heyʼet-i idâre karârıyla tahvîli câizdir.