HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 82 4255 a-Nâmzedlik müddetini bitiren ve fakat beş seneyi ikmâl etmeyen meʼmûra tâm maʻâş ile üç ay meʼzûniyet verilir. Bu müddet zarfında iyileşmezse meʼzûniyeti nısf maʻâş ile üç ay daha temdîd olunur. b-Hizmet müddetleri beş seneden on seneye kadar olan meʼmûrlara tâm maʻâş ile altı aya kadar meʼzûniyet iʻtâ ve lede'l-iktizâ nısf maʻâş ile altı ay kadar daha temdîd olunur. c-Hizmet müddeti on sene veya daha ziyâde olan hasta meʼmûrlara tâm maʻâş ile bir sene ve lüzûmu hâlinde nısf maʻâşla bir sene daha meʼzûniyet verilebilir. [482] Mâdde 45- Türkiye dâhilindeki resmî ve husûsî müessesât-ı sıhhiyede tedâvîleri lüzûmu fennen sâbit olan meʼmûrların tedâvî ve yol masrafları cemʻiyetçe tesviye olunur. Mâdde 46- Hastalıkları 44'üncü mâddede gösterilen müddetlerden daha ziyâde devâm eden meʼmûrînin vazîfelerine nihâyet verilir. Mâdde 47- Hilâl-i Ahmer meʼmûrlarının maʻâşları her ay peşîn verilir. Vefâtı hâlinde verilen maʻâşdan kıste'l-yevm hesâbıyla tevkîfât icrâ edilmez. Mâdde 48- Her ayın on beşinden sonra istiʻfâ eden meʼmûrun peşîn olarak aldığı o ay maʻâşın- dan kıste'l-yevm hesâbıyla tevkîfât yapılmaz. Mâdde 49- Her ayın on beşinden evvel istiʻfâ eden meʼmûrun aldığı peşîn maʻâş istirdâd olunur. Mâdde 50- Ayın on beşinci gününden evvel Hilâl-i Ahmer hizmetine dâhil olan meʼmûrun ay- lığı tâm olarak ve ayın on beşinci gününden sonra taʻyîn kılınan meʼmûrun maʻâşı müteʻâkib aydan iʻtibâren tesviye edilir. Mâdde 51- Kadroda mevcûd hademe ve müstahdemîn dâimâ yalnız terfîʻ ve sigorta husûsunda işbu nizâmnâme ahkâmına tâbiʻdir. Mâdde 52- Müstahdemîn-i dâimenin taʻyîn ve azilleri kâtib-i umûmîlik makâmına âiddir. Mâdde 53- Müstahdemîn-i dâimeye cemʻiyet tarafından senede bir kat elbise, bir çift potin ve her iki senede bir kışlık kaput verilir. Mâdde 54- Müstahdemîn-i dâimeden inde'l-iktizâ tezyîd edilmek üzere biri tanzîm edilecek cedvel mûcebince gece nevbeti vazîfesini îfâ eder. Bu vazîfenin îfâsından dolayı kendilerine bir şey verilmez. Mâdde 55- Muvakkat işler için masraf tertîbinden ve kadro hârici olarak istihdâm olunacak amele ve hademe müstahdemîn-i muvakkateden addolunup hiçbir vechile işbu nizâmnâme ahkâmın- dan müstefîd olamazlar. Mâdde 56- Müfettişler taʻlîmâtnâmesi ile takyîd edilen husûsâtdan gayrı ahvâlde Hilâl-i Ahmer müfettişleri işbu nizâmnâme ahkâmına tâbiʻdir. Mâdde 57- Bi'l-cümle meʼmûrlar işbu nizâmnâme ahkâmına tâbiʻ olmakla berâber haklarında husûsî taʻlîmâtnâme vücûda getirilen şuʻabât taʻlîmâtnâmelerine göre de tevfîk-i harekete mecbûr- durlar. Mâdde 58- Meʼmûrîn bir mahalden diğer mahalle nakl-i meʼmûriyetlerinde merkez-i umûmî tarafından tanzîm edilmiş olan harcırâh taʻlîmâtnâmesi mûcebince harcırâh ve masârıf-ı zarûriyele- rini alırlar.