HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 76 3838 Cemʻiyet, Trablusgarb Harbi'nin dûş-ı zaʻfına tahmîl etdiği mühim vazîfelerin hüsn-i îfâsına çalışmakla berâber taraf taraf merkez ve şuʻbeler küşâd etdi. *** Cemʻiyet ikinci kongresini 13 Nisan 1912 târîhinde dârülfünûnda akdetdi. Hilâl-i Ahmer'e âid muhâberâtın telgraf ve posta [144] ücretlerinden muʻâfiyeti için hükûmet nezdinde teşebbüsde bulunulmasına bu kongre karâr verdi. Balkan Harbi Dört Balkan devletinin müttefikan iʻlân-ı harb etmesi üzerine 12 Teşrîn-i Evvel 1912 târîhinde bir ictimâʻ-ı fevkalâdeye daʻvet edilen kongrede açılacak hastahânelerle Hilâl-i Ahmer'in harb vezâi- fine sarf edilmek üzere 77.428 Türk lirası ve 3 Kânûn-ı Sânî 1913'de zamîmeten 45.000 Türk lirası tahsîsât taleb ve kabûl edildi. Sarfına müsâʻade edilen bu mebâliğ-i mühimme ile İstanbul, Gelibolu, Ispartakule, Hadımköy, Çanakkale, Uzunköprü, Ayastefanos (Yeşilköy), Edirne, Arnavudluk, Garb Ordusu, Konya, Karamür- sel, Bandırma'da açılan hastahânelerde mecrûhîn ve hastagân tedâvî ve bunlardan mâʻadâ Bulgaris- tan'da bulunan üserâmızın müdâvâtı da teʼmîn edildi. Fukarâ-yı muhâcirîne mahsûs İstanbul, İzmir, Edirne, Selanik'de ayrıca hastahâneler açılarak mevte mahkûm olan binlerce bîçâregâna bir ihtimâm ve takayyüd-i mahsûs ile bakıldı. Balkan hükûmetleri nezdinde kalmış olan üserâ ile âileleri arasında teʼsîs-i muhâberât ve üserâ- ya îsâl-i muʻâvenât için cemʻiyet bir üserâ komisyonu teşkîl etdi. Bu esnâda İstanbul'dan ve vilâyât ile memâlik-i ecnebiyeden toplanan iʻânât ve teberruʻât 58.974 Türk lirası 28 kuruşa bâliğ oldu. Kemâl-i minnet ü şükrân ile kayda mecbûruz ki, bu harbde Osmanlı mecrûhînine muʻâvenet ve icrâ-yı müdâvât için Mısır, Hindistan, Romanya, İngiliz, Avusturya-Macaristan, Belçika, İsveç, Ame- rika, Felemenk, Fransız ve Rus Hilâl ve Salîb-i Ahmerleri birçok heyʼet-i sıhhiyeler iʻzâm etdiler. Bir kısmının çadırları ile her türlü levâzımı mevcûd olduğundan bunlar hatt-ı harbde karîb mahallerde seyyâr hastahâneler teʼsîs etdiler. Ancak çadırları ve levâzım-ı mahsûsası bulunmayanlar İstanbul'daki hastahânelerde îfâ-yı hiz- met etdiler. Harb-i Umûmî'de Hilâl-i Ahmer Târîh-i beşeriyetde bir devr-i felâket ve nuhûset olan Cihân Harbi'nin vekâyiʻ-i mühimme ve hâdisât-ı azîme ile mâlâmâl olan uzun senelerinin Hilâl-i Ahmer'e tahmîl etdiği vezâif-i muhtelife ve muʻdile cemʻiyetin târîhçe-i hayâtının en parlak sahîfelerini işgâl eder. Mecrûh ve hasta zâbitân ve efrâda mahsûs hastahâneler teʼsîs ve küşâdı, mecrûh ve hastaların nakli, bir mevt-i muhakkakdan ancak Hilâl-i Ahmer vesâitiyle ve bin türlü müşkilât ile kurtarılarak İstanbul'a nakledilen muhâcirîne çamaşır ve levâzım-ı beytiye tevzîʻi, sıhhiye-i askeriyeye, üserâya, Avrupa'daki talebe ve vatandâşlara harb sakat ve maʻlûllerine muʻâvenet, fukarâ matbahları teʼsîsi,