HİLÂL-İ AHMER MECMÛʻALARI / CİLT 9

Türkiye Hilâl-i Ahmer Mecmû‘ası Sayı 76 3848 Cemʻiyetimiz kendi vesâiti ile tedârük ve pek büyük masârıf ve mesâʻî sarfıyla Anadolu'ya sevk etdiği malzeme-i sıhhiyeyi bilâ-bedel sıhhiye-i askeriyeye iʻtâ eylediği gibi Eskişehir ve Sakarya muhârebeleri esnâsında bi'l-umûm mecrûhîne sarf olunan malzeme-i tımâriyenin hemen kâffesini Hilâl-i Ahmer teʼmîn etmişdir. Muhtelif zamânlarda mecrûhîn-i guzâta gazete, [154] tütün, sigara kâğıdı ve meyve tevzîʻi dahi unutulmamışdır. Kışın takarrübü üzerine seferber ordunun zuʻafâsını soğuklara karşı muhâfaza etmek ve vukûʻu muhtemel hastalıklara mâniʻ olmak üzere efrâdı sıcak tutacak eşyâ iʻtâsı takarrür etmiş ve bu karâr üzerine 47.845 çift yün çorap, 30.264 don, 16.275 yün fanila, 30.548 gömlek, 6.274 kilim, 43.195 avcı yeleği, 6.230 battâniye ve pamuklu iʻmâl edilmek üzere 16.292 kilo pamuk ve 138.085 metre Amerikan bezi cihet-i askeriye depolarına teslîm olunmuşdur. Millî orduların umûmî bir hareket-i taʻarruziye istihzârâtına başladığı hengâmda Adana'da teʼsîsi mukarrer olan askerî mecrûhîn hastahâneleri ihtiyâcâtı için 10.000 yataklık hastahâne levâzı- mının Hilâl-i Ahmerce tedârük ve ihdâsı taleb edilmesi üzerine taleb-i vâkiʻ derhâl isʻâf olunarak bu malzeme kısmen İstanbul'dan ve kısmen Anadolu'daki depolarımızdan iʻtâ olunmuşdur. Harb Mesâibzedelerine Muʻâvenet Harb-i Umûmî'nin hitâmıyla memleketin ekser-i aksâmında âfât-ı harbiyeden ve düşman istîlâ- larından mutazarrır ve müteessir olmuş yüz binlerce halkın her türlü esbâb-ı hayât ve maʻîşetinden mahrûm bulunduğu anlaşılması üzerine bu sefâletzedelere âcilen mümkün olan yardım vesâitinin ih- zâr u îsâli ehemmiyet ile pîş-i teemmüle alınmış idi. Ancak uzun ve masraflı harb senelerinin cemʻiye- tin vazʻiyet-i mâliyesi üzerinde icrâ eylediği teʼsîr ile bu maksada, ihtiyâcın vüsʻatiyle mütenâsib şe- kilde hasr-ı muʻâvenete maʻalesef mâddeten imkân bulunamamış olmakla berâber Harb-i Umûmî'nin ve tahrîbkâr istîlâların ilcââtıyla yurdlarını terk ederek öteye beriye perîşân bir hâlde ilticâ ve Rus ordularının ricʻati üzerine memleketlerine avdet eylemiş olan vilâyât-ı şarkiye ahâlîsinin hakîkaten açlığa ve bakımsızlık yüzünden muhtemelü'z-zuhûr emrâz-ı sâriye ile de ölüme mahkûm vazʻiyetde bulundukları cihetle, evvel emirde vesâit-i mevcûdeyi bu havâlîdeki bedbaht insânlara tahsîs etmiş ve aynı şekildeki muʻâvenetin diğer sâhalara da teşmîlini fedâkâr halkımızın müsellem olan hissiyât-ı semâhat ve insâniyet-perverânesinin yeni tecelliyâtına taʻlîk eylemişdir. En ziyâde hasâr gören cihetler Trabzon, Erzurum, Erzincan ve Şimâlî Mamuretülaziz olmasına mebnî bu üç mıntıkaya ayrı ayrı birer heyʼet-i imdâdiye gönderilmişdir. Bu heyʼetler berâberlerinde mısır, buğday, un, mercimek gibi hubûbâtdan 700.000 kilo, süt hulâsasından 4.500 sandık, 10.000 kilo şeker, 10.000 çift çarık, 100.000 çift çorap, 100.000 metre basma ve Amerikan bezinden maʻmûl 100.000 don, 100.000 gömlek ve mikdâr-ı kâfi keten ile küşâd edilecek muʻâyenehânelerin ihtiyâcına tekâbül edecek mikdârda edviye götürmesi karârgîr olarak 25 Haziran 1919 târîhinde Trabzon, Erzincan ve Şimâlî Elaziz heyʼet-i imdâdiyeleri ve 30 Haziran 1919 târîhinde de Erzurum heyʼet-i imdâdiyesi Trabzon'a müteveccihen yola çıkarılmışdır. Trabzon heyʼet-i imdâdiyesi güzergâhında İnebolu, Samsun ve Giresun'a uğrayarak Giresun şehrinin tahammül-sûz bir fakr u sefâlete maʻrûz ve Hilâl-i Ahmer'in muʻâvenetine bi-hakkın muhtâc bulunduğunu anlamışdır. Bu şehirdeki şiddet-i ihtiyâcı musavver [155] heyʼet raporundan şu fıkraları iktibâs ediyoruz: